鮮茄焗豬扒飯

星期六媽咪 call 我們和細妺回家吃住家飯，仲問我們想飲咩湯，無所謂啦!! 只要係自家制無味精靚湯。加幾個住家小菜，再開多枝紅酒。一家人齊齊整整一樂也!!

飯後我發現廚房又剩下一大煲飯 (D 酒鬼又唔食飯)。我順便將帶它回家，本來打算來一客簡單的蛋炒飯做星期日午餐。忽然想起不如自家製焗豬扒飯，於是便和大少爺去街巿買餸今晚在家玩煮飯仔。

豬扒飯的主要材料當然是豬扒，今次選用了新鮮豬扒加上番茄及香料。其實煮這個飯最重要有靚炒飯、靚豬扒及靚茄汁。煮法完全不難, 只是步驟比較多。

材料：

1. 新鮮豬扒3塊(厚切)
2. 白飯3 - 4碗
3. 小蕃茄3個
4. 洋蔥 1個
5. 乾蔥2粒
6. 蒜頭2粒
7. 罐頭蘑菇1細罐
8. 蛋2隻
9. 香草適量
10. Mozzella芝士適量

做法:

A. 首先用雞蛋、鹽炒飯至金黃色。並將炒好的飯放進焗盤。

B. 豬扒醃好後, 底面煎至約八成熟後, 並放在炒飯面。

C. 茄汁材料及做法:

1. 將乾蔥、蒜頭爆香, 加入已切好的洋蔥一起炒致半熟。
2. 加入蘑菇, 番茄再炒, 再放入約3湯匙茄膏及適量清雞湯。
3. 用茄汁、喼汁、糖、麻油調味, 加入香草及黑椒後再慢火煮至杰身。 如果仍然嫌太稀, 可加適量的生粉水。
   

D. 最後淋上豬扒飯面, 再加上 Mozzella 芝士。用200度焗 20-25分鐘。焗至芝士變金黃即可即成。

後記:今次的番茄可以再較杰少少。有待改善!!

食譜參考: 通之廚房之招牌焗豬扒飯