自家制溫泉蛋 X 吉野家牛肉飯

將要告別日日有住家飯食的日子, 宜家食慣左無味精的住家飯, 有些時間在外出用膳回家后那股味精困在喉嚨地方,實在不太好受呢! 不過, 我覺得要揾下有無一些食譜可以係工餘之時, 仍可以在一小時內煮好。方便來緊在忙碌的返工日子仍可以享受住家飯的樂趣啊!

最近網上的谷友興起買 Miele 蒸爐的熱潮, 不過我唔太愛蒸爐, 可能因為用生鐵鑊或不銹鋼蒸籠都做到, 只係冇得恆溫同所有飯餸同時間做啫。返而焗爐我比較有興趣, 亦因為我喜愛做蛋糕。有一個谷友分享左唔用蒸爐也可自家制溫泉蛋的秘決。真的要試下。於是便想起溫泉蛋 cross over 吉野家牛肉飯啦! 原來真係好易整, 仲好好味添, 大少爺都贊不絕口呢!

要在40-45分鐘完成晚餐, 我的好拍擋係以下的朋友仔:

溫泉蛋做法:

1.  先煲滾熱水大約 80-82度, 放入保暖杯
2.  將雞蛋洗乾淨, 再放入已有熱水的保暖杯
3.  將杯蓋合上, 計時 30-35mins

注意, 每個保暖杯的保溫功能不一,要自行測試

在溫泉蛋做緊的時間, 我們又可以準備白飯同吉野家牛肉。
吉野家牛肉材料:

火鍋牛肉  一盒  (唔駛買太靚既牛肉，最緊要夠薄身既)

洋蔥      一個半

醬汁料：

味醂: 4.5湯匙
煲仔飯醬油: 1茶匙

生抽: 3茶匙

鹽: 1/8茶匙

水: 2湯匙

做法:

1.  先將牛肉片解凍，並要分開佢一塊塊，備用

2.  洋蔥切條

3.  然後燒熱個煲/鑊再加油，油熱後落牛肉及洋蔥炒至半成熟盛起備用

4.  醬汁料攪勻，放進之前炒過牛肉既煲/鑊煮滾，將 洋蔥及牛肉回鑊，煮到汁料翻滾熄火

5.  將牛肉連汁放上飯面

最后, 在牛肉飯面準備一個放溫泉蛋的位置, 打開溫泉蛋放上即成。真係 45分鐘有住家飯食啦!




食譜參考:
大少奶食譜 [哼野家牛肉飯]

雙層芒果芝士蛋糕 (Double Desk Mango Cheese Cake)

終於都塵埃落定, 我的悠長假期又快將要結束了。其實內心有一點點兒的忐忑, 心裡當然希望有一份長久而穩定的工作, 我亦心知工作只會越來越難做, 越做越吃力。加上又快要開學鳥, 一想起功課考試, 真的有點透不過氣呢! 無論如何人總事要面對不同的挑戰, 路途能夠行過一關又係一個新的開始。在一個開始前一定要做一些自己喜歡的工作, 我又向自己的難度挑戰, 整下依個蛋糕。

依個蛋糕其實唔算難做只係步驟煩多和工具、模具較多。蛋糕的組合分成唔用層面, 由最高的 Mascarpone Cheese 至最底層的消化餅底。一共分成5層, 每一層唔同的芝士餡合成多重口感的蛋糕。

[1] Mascarpone 芝士層
[2] 芒果芝士層
[3] 海綿蛋糕 (6吋)
[4] 芒果芝士層
[5] 消化餅底 (7吋蛋糕模)

首先, 我們須要預備海綿蛋糕一個 (6吋)......

海綿蛋糕材料:

雞蛋: 2隻
砂糖: 40gm
蛋糕油: 10gm
低筋麵粉: 40gm
牛奶: 2Tbsp (湯匙)
如果想要朱古力 味道蛋糕,可另加朱古力粉 5gm

做法:

1.  預熱焗爐攝氏180度
2.  將雞蛋、砂糖同蛋糕油以打蛋器快速打8分鐘直至企身呈奶白色
3.  將巳篩過麵粉拌入, 分成2次以打蛋器慢速同蛋糊攪勻
4.  加入牛奶, 再用打蛋器慢速同蛋糊攪勻
5.  把蛋漿倒入焗盤內放入焗爐以180度焗20-25分鐘

正當我們的海綿蛋糕在焗爐烤焗時, 我們要準備蛋糕的消化餅底 (7吋)。


消化餅底材料:

消化餅: 5塊大約 75gm
砂糖: 7gm
牛油(unsalted butter): 35gm

做法:

1.  牛油用微波爐加熱成溶液,備用
2.  把消化餅用木棍壓碎，再加入牛油溶液
3.  混合後壓在蛋糕模內，放入雪櫃雪凍備用。

接下來, 我們開始做下層的芒果芝士糊。在未開始前, 我們要先預備好以下的材料。

1.  先將 400gm 淡忌廉用打蛋器高速打起至7成並放於雪櫃內備用
2.  將魚膠片分別 10gm (大約2塊半) 同 2.5gm (大約半塊), 座於熱水中成溶液, 備用


芒果芝士糊材料:

忌廉芝士 (Cream Cheese) : 220gm
砂糖 (Sugar): 40gm
牛奶 (我用北海道牛奶): 20gm
芒果蓉 (Manago Puree): 180gm
魚膠片(Gelatin): 10gm
淡忌廉 (Whipping Cream): 100gm (以打起計)
新鮮芒果粒: 80gm <多少可以隨意>

芒果芝士糊做法:

1.  忌廉芝士同砂糖放器皿打至軟身
2.  再加入牛奶拌均
3.  分2次加入芒果蓉
4.  把已經溶好的魚膠溶液加入芝士糊中
5.  拌入己打起的 100gm 淡忌廉
6.  最后加入已切粒的新鮮芒果

我們在雪櫃取出已雪硬的消化餅底, 將芒果芝士糊放入至蛋糕盤的一半, 再將已經做好的海綿蛋糕放至蛋糕盤的中間。由於海綿蛋糕的尺寸較蛋糕盤為小, 所以蛋糕放入后四邊仍有空位。最后, 放入餘下的芒果芝士糊至蛋糕盤頂部。再放入雪櫃備用。

然後我們要去做我們上層的 Mascarpone 芝士餡啦!

Mascarpone 芝士糊材料:

砂糖 (Sugar): 45gm
蛋黃(Egg yolk): 2隻 (約 40gm)
Mascarpone Cheese: 125gm
魚膠片(Gelatin): 2.5gm
淡忌廉 (Whipping Cream): 125gm (以打起計)

Mascarpone 芝士糊做法:

1.  蛋黃加入砂糖, 坐在熱水中以高速發打。直至濃稠及少許奶白色
2.  取出步驟 [1] 約50 gm 蛋糊備用
3.  將 Mascarpone Cheese 放入大器皿中攪至軟滑
4.  加入蛋糊再用打蛋器慢速攪勻
5.  拌入己打起的 125gm 淡忌廉,再以中速打至硬身
6.  把已經溶好的魚膠溶液加入芝士糊中拌勻
7.  放入唧袋用以下的唧咀唧在蛋糕面上
8.  再放回雪櫃, 雪大約4小時。我自己會雪過隔夜

完成后, 最后步驟在雪櫃取出蛋糕再用風筒吹均蛋糕盤約一分鐘脫模。並在蛋糕面灑上防潮朱古力粉, 再加裝飾即成。




食譜參考:
Krizia@blog
Club cake kitchen <海綿蛋糕>

自家制抺茶雪糕 (無雪糕機製作)

在社交網站的發達, 網友們不停又 upload 自己的敗家情報, 又 upload 自家創作或跟那本書裡的專欄作者的食譜製作的相片同網誌。當然亦有一些自稱係地獄廚神的燒廚房實碌。又有圖片又有 video 真係一個忙裡偷閒的消遣品, 所以亦成為我們生活上的一個重要的部份。

依幾日又考完試, 又開始毒瘾發作的在網上爬文, 睇睇有怎麼新奇又簡易的食譜。好想在返之前全部完成。哈哈! 又比我發現左一個可以自家制雪糕但無須雪糕機的食譜, 只須要電動打蛋器便可, 真係唔試唔得呢!

材料:
淡忌廉...........................270ml
北海道牛奶....................250ml
砂糖...............................120gm
(由於抹茶粉帶有少少甘苦味, 所以糖的份量相對比較多)
抹茶粉............................4湯匙

做法:

1.   將淡忌廉用中速打成泡狀約1-2分鐘，起泡便可以
2.   须要預備另一個盆子，將牛奶加入糖及抹茶粉打勻，此時可自行試味，睇睇甜度是否適合,       但切記要較自己須要的甜度多少少,因為我們重有淡忌廉)
3.   將已打好起泡的淡忌廉倒入牛奶抹茶混合物並用打蛋器打勻，約打3-5分鐘
4.   完成後，將整個 Mixing bowl 放入雪櫃冰格, 冷藏一個小時
5.   一小時從雪櫃取出混合物, 表面會有有少許凝結，須要再打勻大約3-5分鐘，然後再放回冰       格再雪一小時, 緊記要用保鮮紙蓋好才放入冰格。
6.   如是者，步驟5須要重覆做三次，每隔一小時打一次。
7.   完成左三次的打勻, 每一次的打勻步驟應該會一次比一次稠。最後就須將混合物倒入雪糕         盒內，放入雪櫃冰格至少5-6個鐘，完成後就變成美味的雪糕。


訣竅題示:

• 忌廉選淡味的 heavy whipping cream or thicken cream
• 攪拌的動作很重要，因為要把空氣充打進雪糕裡，少一次也會影響質感
• 如果覺得全脂奶太肥,可用低脂奶。但味道可能冇咁香

其實依個食譜的製作方法不困難, 只須要有一個空閒的下午便可呢!





食譜參考自 Candice Kitchen 的雪糕食譜

清湯蘿蔔牛腩鍋

近排在家真的有百無聊賴, 不過又真係好珍惜現有的光景, 一旦返工的日子來臨又係做到天昏地黑呢! 

最近在 Facebook 的 Group 發現原來在義大利 Amazon 購買 Le Creuset 的廚具有部份連運費都比香港專門店便宜, 加上足不出戶有速遞員送到府上。當然買一件貨品係唔會抵,但當你買幾件廚具而同時付運相等於將運費攤分。變相每件貨品的價值就好扺啦

等了又等, 今日在 Amazon 買左的新玩具啱啱到左, 我原以為外面係黑色,裡面的內裡就係黑珐瑯,咁就可以當個鑊去煎炒燜炸, 可惜事與願違個煲的內裡係白珐瑯。原來黑色都有唔同的黑度去配合唔同的珐瑯。不過無所謂餸可以照做啫。好我就用件新玩具整個清湯蘿蔔牛腩鍋比大少試菜&lt;即係做白老鼠啦&gt;

材料:

牛腩 / 牛坑腩    - 約 1-1/2 磅
白蘿蔔 - 1-2 個
唐芹 - 1/4 個
花椒 - 2茶匙
八角 - 3粒
冰糖 - 1小粒
薑 - 數片
葱 - 數條
蒜頭 - 4-5粒
鹽,雞粉 - 少許
芫茜 - 少許

做法:

1.  先將牛坑腩洗淨抹乾備用
2.  燒滾一鍋清水,同時加入薑數片及蔥段數棵入水。再放牛腩入內出水約10分鐘。
3.  出水后,牛腩撈起用凍水沖洗乾淨
4.  先燒熱鍋子再下少許生油, 放入薑片数片及已拍扁的蒜頭, 最后放回已飛水的牛坑腩
5.  再注入滾水,水要浸過牛腩面
6.  加入花椒、八角及冰糖煲至大滾后轉中至小火並把煲蓋合上
7.  煮 15-20 分鐘, 熄火焗15分鐘
8.  重覆步驟 7 一次, 把煲蓋打開放入蘿蔔件，及芹菜再合上煲蓋煮15-20 分鐘
9.  取走薑片、花椒八角及芹菜唔須要的東西,再取出已燜腍的牛腩並切件
10.煲內只餘下蘿蔔及清湯煮滾，放少許雞粉及鹽作調味
11.放回切件的牛腩,加入蔥段及芫茜即成


其實依個餸唔難做,只係燜餸的時間比較長。同埋唔記得買芫茜, 所以無咁香。而食時也可加入炸蒜蓉,味道更好。




食譜參考自志太部落格的兌現‧清湯牛腩

出差公幹之旅 - 馬達加斯加 (Madagascar) 下篇

又到左旅程的尾聲, 依一晚係我在馬達加斯加的最后晚餐。 好感謝廠長同各位同事帶左我去法國餐, 今次依間係兩姊妹開的法國菜館。

依間係一間歷史尤久的法國菜館, 也比較傳統。食物的質素很高, 反而餐廳的裝飾係簡僕而沒有特別的情調。

每一檯的桌面都有一朵玫瑰花。

牆上的壁畫

當晚食飯時, 依兩兄弟不停為我們伴奏。我們仲可以點歌。他們用的全部用一些自製的簡單的樂器, 但奏出來的音樂真係好動聽。

好啦, 今晚的晚餐正式開始。我們識得法文的一位同事為我們點菜,當然有出名的生牛肉同鵝肝。鵝肝好香, 個生牛肉超讚!!!!!

再黎主菜加甜品。樣樣都好好食呢........

其實我們一共成8人去玩同食, 有很多其他的主菜我無拍照留念。不過埋單真係抵食到你唔信, 只須要美金116元。每人消費少於20美元。我們又諗深一層當地人的平均收入大約30美元一個月。在他們黎說絕對係高消費的菜館。

最后一天的我又怎會放過去 shopping 的好機會呢。其實馬達加斯加有最好的 Vanila, 在香港要成30-40元2支。在馬島可以買成扎, 加上其他的香都好好食料同辣醬添。行行下, 又比我發現左馬島的果醬原來好好食。仲用新鮮的食材做, 而且個包裝好靚又唔似一般在香港買的果醬好多糖而好杰。尤其香蕉熱情果醬, 好可惜我買得太少......

在沿途的我又再一次影下馬島的街道同房屋。雖然我真的不知道我會否再有機會踏足依個地方, 但係我會記住依個地方的人同事物, 他們永遠都會在我的腦海裡面。

出差公幹之旅 - 馬達加斯加 (Madagascar) 中篇

時間過得好快, 一轉眼又差不多一星期了。由於我星期日下午要坐飛機回程, 所以我D同事在星期六的下午帶我出去遊山玩水, 他們首先帶我去返果間火車站餐廳,先眾一杯咖啡同食件餅做個 Tea 吧!

沿途的風景都真係好靚呢........

在餐廳的週圍, 我見到很多的士。由於馬達加斯加以前是法國殖民地，所以有很多事物都受法國的影響，正如在首都 Tana 行走的汽車大都是這個法國品牌的產品。在 Tana 行走的計程車也是雪鐡龍這個法國品牌的產品，她沒有豪華的座椅、更沒有冷氣設置、車廂內裡更是由木材製造，但塔那的士有一種古老而獨特的法國情懷。

我們坐在室外享受陽光加上草地上的房屋。再黎一杯香濃的咖啡, 又有一番法國的情調呢

飲完下午茶, 我們架車上左一個在市中心的小山丘,上面可以睇到整個市中心的建築物。 加埋夕陽西下的餘輝, 景色好迷人啊!

出差公幹之旅 - 馬達加斯加 (Madagascar) 上篇

由於製衣工廠貨期問題, 客人要求跟我們飛去一轉非洲的馬達加斯加工廠。好啦, 我又出發了.........

依一處地方其實唔係好多香港的廠商或者遊客會去經商同觀光, 所以香港係唔會有直航機加上唔係天天有機, 一定要轉機。我們已經用最快的途徑經 Mauritius , 之不過 Mauritius 政府為左要增加他們的旅遊事業, 希望多一點的外匯收入, 所有的旅客途經毛里求斯的旅客, 在回程或去程一定要留宿一晚。而果一晚的酒店費係由航空公司負責, D酒店係好靚,係一D resort feel 的渡假酒店。可惜離機場太遠, 第二日我們又早機去馬島。我們最終揾左間在機場附近的酒店算了。

去到馬島當然係要開工, 不過在工餘的時間都會出去食飯。如果真係要去行街就只有等星期六同日才有機會。馬達加斯加原來是世界第四大島，是非洲大陸的東南方、沿海的一個島國。馬達加斯加曾於十九世紀後期被法國殖民，所以有很多事物都受法國的影響。當然有很多同好平的法國菜館在馬島啦。

今日去依間法國餐廳的原址係一個火車站, 不過依家改建成一家餐廳也有酒店的服務。 但保留左原有的路軌用作貨物的運輸。間餐廳係咪好 Romantic 呢? 其實他們的法國牛扒同鵝肝都好得嫁。

由於夜晚太夜, 我會在白天再黎依家餐廳。

工作的關係, 我會住在工廠的宿舍。其實環境都唔錯, 早午晚餐有專人服待加上每日幫你洗同燙衫。加上每個房間有獨立洗手間, 仲有 Wifi 上網。宿舍個景觀都不錯呢。

法式小甜點之馬卡龍 Macaroon

今日係悠長假期的第二天, 大少爺又開始要番 shift duty.  其實咁樣他會多D時間陪我。哼!!!!!  言歸正傳, 我一向都好討厭食這種小圓餅, 因為在街買的什麼出名甜品店之出品實在太甜。所以我晤會買亦唔喜愛食。

之但係呢她個樣又真係好靚, 又真係好討人歡心的, 再加上七彩鮮艷顏色互相的配搭。的而且確想一口咬落去。加上在網上有很多人話依個甜品好難整。我的好奇心同好勝心驅使我想試下自己整。我在幾星期前曾經自己睇食譜自學整過, 不過失敗左。也整左幾次都失敗。令我百思不得其所, 於是在 Groupon 搵在間教室去學整。據說依個阿 Sir 曾經在 Tony Wong 處打工, 他初初教我們的時候有少少串, 不過我后來不停咁問他有關整 Macaroon 同其他 cake 的野, 他又真係好好人咁幫我一一解答。我最后亦知自己之前唔成功的原因。

<sup><sub>蛋白餅材料: 

蛋白20gm
幼細杏仁粉 20gm
糖霜 40gm
砂糖 7gm (可加至10gm駛蛋白容易企身)
食用色素    少許</sub>

蛋白餅做法:</sup>

1.  預熱電焗爐至攝氏140度, 預備適合自己焗爐大少的焗盆和焗紙
2.  糖霜同杏仁粉拌勻並最好篩一次,令兩者混合同幼滑一點
3.  蛋白打起至見到有輕微水波紋。其實已經有少少忌廉狀
4.  將砂糖一次放入蛋白, 然后繼續打至硬忌廉狀 (有勾型出現)
5.  加入色素並輕微搞動
6.  再拌入一半已經混合好的糖霜和杏仁粉, 輕輕拌勻。隨后再加入餘下之混合物, 用 cut and fold 的方法令混合物同蛋白混為一體。此過程不能搞動得太耐, 否則蛋白餅唔起。
7.  放入唧袋, 可以預備定圓型大小, 將混合物唧在焗爐紙上, 在室溫中風乾至表面完全唔黏手的簿膜。大約須時 30分鐘到一小時
8.  放入焗爐用攝氏140度焗約15分鐘

朱古力餡:

黑朱古力 (70% Coco)    70gm
忌廉 110gm

黑朱古力打碎70g放在碗內，隔熱水待朱古力完全溶化; 加入whipping cream 110gm，以打蛋器打勻(電動或手動均可)，包好放入雪櫃雪至稠即成待用。


重點注意事情:

1.  蛋白的重量要準確, 而且要預先放在室溫最少6小時。再者,蛋白同蛋黃分開時, 蛋白不能沾到任何蛋黃。否則蛋白打不起

2.  糖霜我自己用專門做 Macaroon 的

3.  糖的作用可以令蛋白企穩, 所以砂糖一定要同蛋白混合。

4.  當放混合物入唧袋時, 應該好似溶緊的雪糕, 唧完放一陣個餅面會自動平滑。如果唧完出黎個尖尖唔會變返平, 應該係蛋白打得太硬, 相反, 一唧已經平晒就好大可能太稀而蛋白打得唔夠



食譜參考:    Joycake 的馬卡龍製作
參考 V女廚房的Chocolate Macaroon 朱古力馬卡龍